IHE ỌGỤGỤ NKE MBỤ – Jenesis 3:9-15, 20 
Ihe Ọgụgụ e wetara n’Akwụkwọ Jenesis

Mgbe Adam riri mkpụrụ osisi ahụ, Onye-nwe-anyị Chineke kpọkuru ya ma jụọ ya, “Ebee ka ị nọ?” Ọ zara, “Anụrụ m gị n'ime ubi, ma ụjọ tụrụ m n’ihi na m gba ọtọ, n’ihi ya, m zoro onwe m.” Mgbe ahụ Ọ jụrụ, “Onye gwara gị na ị gba ọtọ? Ị rịrị, ya mere, mkpụrụ osisi ahụ M gwara gị ka ị ghara iri?” Nwoke ahụ zara, “Nwanyị ahụ ị tinyere n’ebe a ka ya na m nọ— ọ bụ ya nyere m mkpụrụ osisi ahụ, ya mere, m riri ya.” Onye-nwe-anyị Chineke wee jụọ nwanyị ahụ, “Gịnị mere i ji mee ụdị ihe ahụ?” Nwanyị ahụ zara, “Agwọ ahụ raara m, ya mere, m riri ya.” Mgbe ahụ Onye-nwe-anyị Chineke sịrị agwọ ahụ: “N’ihi na i mere nke a, a gaghị ekwe gị n’etiti anụmanụ niile na n'etiti ihe niile na-akpụ akpụ; Ị ga-eji afọ gị na-akpụ akpụ, ájá ka ị ga-erikwa ụbọchị niile nke ndụ gị. M ga-etinye ịkpọasị n'etiti gị na nwanyị ahụ, na n'etiti mkpụrụ gị na mkpụrụ ya; Ọ ga-akụ isi gị, ị ga-akụkwa ụkwụ ya.” Nwoke ahụ kpọrọ nwunye ya Iv n’ihi na ọ ghọrọ nne nke ihe niile dị ndụ.

Okwu nke Oseburuwa
A. Eneke dịrị Chukwu

Ma ọ bụ

IHE ỌGỤGỤ NKE MBỤ – ỌRỤ NDỊOZI 1:12-14 
Ihe Ọgụgụ e wetara n’Akwụkwọ Ọrụ Ndịozi

Mgbe e buliri Jisọs n'eluigwe, Ndịozi ahụ si n'ugwu ahụ a na-akpọ Olivet, nke dị nso na Jerusalem, lọghachị Jerusalem, otu ụzọ njem ụbọchị izu ike. Mgbe ha batara n'obodo ahụ, ha gbagoro n’ụlọ elu ebe ha nọ na-ebi, Pita na Jọn na Jems na Andru, Filip na Tọmas, Batọlọmiu na Matiu, Jems nwa Alfiọs, Saịmọn onye Zilot, na Juda nwa Jems. Ndị a niile jiri otu obi tinyekwa onwe ha n’ekpere, ha na ụfọdụ ndị nwanyị, na Meri nne Jisọs, na ụmụnne Ya.

Okwu nke Oseburuwa
A. Eneke dịrị Chukwu

ABỤỌMA NA AZỊZA – Ps. 87:1-2, 3, 5, 6-7 
Azịza: (3) A na-ekwu ihe dị ebube banyere gị, Obodo nke Chineke.

1. Ntọala Ya n’elu ugwu dị nsọ Onyenweanyị hụrụ n’anya:
Ọnụ ụzọ Zion, karịa ebe obibi ọ bụla nke Jekọb.
Azịza: A na-ekwu ihe dị ebube banyere gị, Obodo nke Chineke.

2. Na banyere Zion ka ha ga-asị: “A mụrụ onye ọbụla n’ime ya;
Ọ bụkwa Onye Kasị Elu bụ onye guzobere ya.”
Azịza: A na-ekwu ihe dị ebube banyere gị, Obodo nke Chineke.

3. Ha ga-ede, mgbe a na-edebanye aha ndị mmadụ:
“A mụrụ nwoke a n’ebe ahụ.”
Onye ọbụla ga-abụ abụ n’ịgba egwú ha, sị: “Ebe obibi m dị n’ime gị.”
Azịza: A na-ekwu ihe dị ebube banyere gị, Obodo nke Chineke.

MBEKU ALLELUIA ALLELUIA:
Agbọghọ Na-amaghị Nwoke nke nwere obi ụtọ, ị mụrụ Onye-nwe-anyị; Nne dị asọ nke Ụka, ị jiri Mmụọ Nsọ nke Ọkpara gị Jisọs Kraịst na-eme ka obi anyị dị ọkụ.
ALLELUIA.

OZIỌMA – Jọn 19:25-34 
Ihe Ọgụgụ e wetara n’Oziọma dị asọ nke Jọn dere

N’akụkụ obe Jisọs ka nne Ya guzo, na nwanne nne Ya, Meri nwunye Klọpas, na Meri Magdalin. Mgbe Jisọs hụrụ nne Ya na onye na-eso ụzọ ahụ Ọ hụrụ n'anya ka ọ nọ ebe ahụ, Ọ sịrị nne Ya, “Nwanyị, lee nwa gị.” Mgbe ahụ Ọ sịrị onye na-eso ụzọ ahụ, “Lee nne gị.” Ma site n'oge ahụ, onye na-eso ụzọ ahụ kpọrọ ya banye n'ụlọ ya. Mgbe nke a gasịrị, n’ịmara na ihe niile agwụla ugbu a, iji mezuo Akwụkwọ Nsọ, Jisọs sịrị, “Akpịrị na-akpọ m nkụ.” E nwere ite jupụtara na mmanya nkịtị. N'ihi ya, ha tinyere ogbo mmanya a banyere na ya n’elu mkpụrụ osisi haịsọp wee kpoo ya n’ọnụ Ya. Mgbe Jisọs ṅụsịrị mmanya ahụ, Ọ sịrị, “Emezuru ya.” Ozugbo ahụ, Ọ kporo isi Ya, wee nyefee Mmụọ ahụ. Ugbu a, ebe ọ bụ ụbọchị nkwadobe, ka ozu ghara ịnọgide n’obe n'ụbọchị izu ike, n’ihi na ụbọchị izu ike nke izu ahụ bụ ụbọchị dị nsọ, ndị Juu rịọrọ Pilat ka e gbajie ụkwụ ha wee wepụta ha. Ya mere ndị agha ahụ bịara gbagbue ụkwụ nke mbụ na nke onye nke ọzọ a kpọgburu n’obe ya na Jisọs. Ma mgbe ha bịakwutere Jisọs ma hụ na Ọ nwụwo, ha egbujighị ụkwụ Ya, kama otu onye agha wara akụ̀ n’akụkụ Ya, ozugbo ahụ Ọbara na mmiri si n'ime ya pụta.

Oziọma nke Oseburuwa
A. Ekene dịrị Chukwu