IHE ỌGỤGỤ NKE MBỤ –2 Kgs:  5:14-17 
Ihe Ọgụgụ e wetara n’Akwụkwọ Abụọ nke Ndị Eze

N’usoro okwu Elisha, onye Chineke, Naaman manyere n’osimiri Jọdan ugboro asaa, wee bụrụ onye a sachara ọrịa ekpenta. Ahụ ya bịara dị mịrịmịrị ka ahụ nwatakịrị. Mgbe Naaman na ndị niile so ya lọghachiri na be Elisha, Naaman guzooro n’ihu ya were kwuo sị: “Ugbu a ka m jiri mara na e nweghị Chineke ọzọ n’ụwa niile karịakwa n’ala Izrel. Biko, nara onyinye nke a n’aka nwodibo gị.” Ma Elisha zara ya sị: “N’aha Chineke dị ndụ, Onye m na-agbara odibo, agaghị m ana gị ihe ọ bụla.” Ọ bụ ezie na Naaman rịọsiri ya ike, ma Elisha jụrụ ajụ. Naaman were kwuo sị: “Ebe ị na-ekweghị anara m ihe ọ bụla, kwenụ ka e kponye m aja si n’ala ụnụ; aja ịnyịnya ibu abụọ nwere ike ibu, n’ihi na nwodibo gị enweghị ike ịchụnyere chi ọzọ aja nsure ọkụ, ma ọ bụ ụdị aja ọ bụla. Ọ bụ sọ Chineke ka m ga-achụnyere aja.

Okwu nke Oseburuwa
A. Eneke dịrị Chukwu

ABỤỌMA NA AZỊZA YA : Ps: 97:1-4 Az. 2 
Azịza: Onyenweanyị egosila mba niile nzọpụta Ya.

1. Kweerenụ Onyenweanyị ukwe ọhụrụ,
n’ihi na Ọ rụọla ọruụ ebube.
Aka nri Ya dị asọ ewetala nzọpụta.
zịza: Onyenweanyị egosila mba niile nzọpụta Ya.

2. Onyenweanyị egosila nzọpụta Ya;
O gosịla mba niile ikpe Ya ziri ezi.
O chetala ịhụnanya na eziokwu Ya maka ụlọ Izrel.
zịza: Onyenweanyị egosila mba niile nzọpụta Ya.

3. Ụwa niile ahụla nzọpụta nke Chukwu anyị.
Ụwa niile, ñụrịbanụ na Chineke,
tibenụ mkpu ọñụ, kwebenụ ukwe otito.
zịza: Onyenweanyị egosila mba niile nzọpụta Ya.

IHE ỌGỤGỤ NKE ABỤỌ –2 Tim:  2:8-13 
Ihe Ọgụgụ e wetara n’Akwụkwọ Ozi nke Abụọ Pọl dị asọ degaara Timoti

Chetakwa Oziọma ahụ m na-ebugharị: “Na Jesu Kristi, Onye bilitere n’ọnwụ, si n’agbụrụ Devid pulite’. Ọ bụ n’ihi ihe a, ka e jiri bo m ahụhụ n’isi; nke na e kere m agbụ, ka a ga-asị na, arụ m mere bụ e mebeghị. Mana ha enweghị ike ike ozi Chineke agbụ. Ọ pụtara na ana m edi ahụhụ niile a, n’ihi ndị a họtara ahọta; ka o wee bụrụ na n’oge ikpeazụ, ha ga-enweta nzọpụta ahụ nọ n’ime Kristi Jesu; na otito na ebube dị ebighị ebi, nke so ya na-aga. Ihe a bụ okwu anyị kwesịrị ịdabere n’elu ya: Ọ bụrụ na anyị soro Ya nwụọ, ọ pụtara na anyị ga- eso Ya adị ndụ. Ọ bụrụ na anyị jigidesie okwukwe anyị ike ruo na ngwụcha, anyị ga-eso Ya achị. Ọ bụrụ na anyị agọnarị Ya, Ọ ga-agọnarị anyị. Ọ bụrụ na anyị ekwesịghị ntụkwasị obi, O kwesịrị ntụkwasị obi, maka na O nweghị ike ịgọnarị onwe Ya.

Okwu nke Oseburuwa
A. Eneke dịrị Chukwu

MBEKU – 1 Thes. 5:18
Aleluya, aleluya!
Na-enyenụ ekele n’ihe niile: Nke a bụ mmasị 
Chineke maka ụnụ niile n’ime Jesu Kristi.
Aleluya!

OZIỌMA –Lk: 17:11-19 
Ihe Ọgụgụ nke a si n’Oziọma dị asọ nke Luk dere

Otu mgbe, Jesu si n’agbata Samerịa na Galili na-aga Jerusalem. Mgbe Ọ na-abanye n’otu obodo nta, ndị ekpenta iri zutere Ya. Ha guzopụrụ iche wee kpọọ Ya: “Nna anyị! Jesu! Meere anyị ebere!” Mgbe Ọ hụrụ ha, Ọ sịrị ha: “Gaanụ, gosị ndị Ụkọchukwu onwe ụnụ!” Mgbe ha na-aga n’ụzọ, ka a sachara ha ọrịa ekpenta. Mgbe otu n’ime ha hụrụ na a gwọọla ya, ọ laghachiri were oke olu, na-enye Chineke otito. Ọ bịara daa n’ala n’ụkwụ Jesu, na-enye Ya ekele. Nwoke ahụ bụ onye Samerịa. N’ihi ya ka Jesu jiri jụọ sị: “Ọ bụ na ọ bụghị mmadụ iri ka a gwọrọ ekpenta? Olee ebe itolu ndị ọzọ nọ? Ọ pụtara na o nweghị onye ọzọ lọghachiri inye Chineke otito, ma ọ bụghị onye a bụ onye mba?” O wee sị nwoke ahụ: “Bilie, gaa nke gị, okwukwe gị azọọla gị!”

Oziọma nke Oseburuwa
A. Ekene dịrị Chukwu