IHE ỌGỤGỤ NKE MBỤ –Thes: 4:1-8 
Ihe Ọgụgụ e wetara n’akwụkwọ mbụ Pọl Degaara Ndị Tesalonịka

N’ikpeazụ ụmụnna m, ụnụ mụtara n’aka anyị otu ụnụ ga-esi dị ndụ wee na-eme ihe ga-amasị Chineke. Otu ahụkwa ka ụnụ si adị ndụ ruo ugbu a. Nke a mere anyị ji arịọ, ma na-arịọsikwa ụnụ ike n’aha Dinwenụ anyị Jesu Kristi ka ụnụ mee karịa. Ụnụ matara nkuzi dị icheiche anyị kuziiri ụnụ site na Dinwenụ Jesu Kristi. Nke a bụ uche Chineke, ka ụnụ dị asọ gharakwa ibi ndụ ruru unyi n’ụzọ ọbụla. Ka onye ọbụla n’ime ụnụ mụta otu ọ ga-esi jiri ugwu na-echekwa onwe ya n’ịdị nsọ; Ọ bụghị site n’agụụ ịkwaiko dịka ndị mba ọzọ ndị amaghị Chineke. Onye ọbụla ghara imejọ mọbụ imegide nwanne ya n’ihe dị otu a, n’ihina Dinwenụ bụ onye na-abọ ọbọ n’ihe niile ndị a, dịka anyị siri dọọ ụnụ aka na ntị na mbụ. Chineke akpọghị anyị ka anyị bụrụ ndị ndụ ha na-adịghị ọcha kama ka anyị bụrụ ndị dị nsọ. Onye ọbụla nke jụrụ ịnara nkuzi a, ọ bụghị mmadụ ka ọ jụrụ, kama ọ jụrụ Chineke onye na enye ụnụ Mmụọ Nsọ ya.

Okwu nke Oseburuwa
A. Eneke dịrị Chukwu

ABỤỌMA NA AZỊZA – Ps. 97:1, 2, 5-6, 10, 11-12 
Azịza: Ñụrịanụ n’Onyenweanyị ụnụ bụ ndị eziomume

1. Onyenweanyị bụ eze! Ka ụwa ñụrịba;
Ñụrịanụ, ala niile mmiri gbara gburugburu
Urukpu na ọchịchịrị gbara ya okirikiri
O jiri eziomume na ikpe nkwụmọtọ were tọọ ntọala ocheeze ya.
Azịza: Ñụrịanụ n’Onyenweanyị ụnụ bụ ndị eziomume

2. Ugwu niile gbazere dịka mmanụ n’ihu Onyenweanyị
N’ihu Dinwenụ nke ụwa niile
Eluigwe na-ekwupụta eziomume ya
mba niile na-ahụkwa otito ya.
Azịza: Ñụrịanụ n’Onyenweanyị ụnụ bụ ndị eziomume

3. Onyenweanyị na-ahụ ndị niile kpọrọ ihe ọjọọ asị n’anya,
ọ na-echekwaba ndị niile kwere na ya,
ọ na-azọpụtakwa ha n’aka ndị ajọ mmadụ.
Azịza: Ñụrịanụ n’Onyenweanyị ụnụ bụ ndị eziomume

4. Ihe na-achakwasị ndị na-akwụba aka ha ọtọ,
Añụrị na-adịrị ndị obi ha dị ọcha.
Ñụrịanụ n’Onyenwanyị ụnụ bụ ndị eziomume,
tookwanụ aha ya dị nsọ.
Azịza: Ñụrịanụ n’Onyenweanyị ụnụ bụ ndị eziomume

MBEKU:
Alleluia, Alleluia:
Okwu gị bụ mpanaka na edu m, bụrụkwa ihe n’ụzọ m.
Alleluia.

OZIỌMA –Mt: 25:1-13 
Ihe Ọgụgụ nke a si n’Oziọma dị asọ nke Matiu dere

Jesu gwara ndị na-eso ụzọ ya sị, “Alaeze eluigwe dịka ụmụagbọghọ iri ndị buuru iteọkụ ha gaba izute nwoke na-agba akwụkwọ. Ise n’ime ha bụ ndị nzuzu ma ise ndị ọzọ nwere uche. Ndị nzuzu ahụ buuru iteọkụ ha n’ejighị mmanụọkụ. Ma ndị ahụ maara ihe buuru iteọkụ na mmanụọkụ ha. Mgbe onye na-agba akwụkwụ apụtaghị ngwangwa, ụra tụbara ha, ha wee rahụ. N’etiti abalị, mkpu dara sị, ‘Leenụ onye na-agba akwụkwọ pụtanụ ka ụnụ zute ya! Mgbe ahụ ụmụagbọghọ ndị ahụ niile biliri wee gbalie ọkụ ha. Ndị nzuzu ahụ gwara ndị nwere uche sị, ‘Biko, nyetụnụ anyị mmanụ ụnụ n’ihina ọkụ anyị na-anyụ anyụ.’ Ma ndị ahụ nwere uche zara sị, ‘Eleghị anya, mmanụ anyị ji agaghị ezuru anyị na ụnụ. Kama gaanụ zụrụ nke ụnụ n’aka ndị na-ere ya.’ Onye na-agba akwụkwọ batara mgbe ha jere ịzụta mmanụ. Ndị dị njikere soro ya banye n’oriri agbamakwụkwọ e wee mechie ụzọ. E mechaa ụmụagbọghọ ise ndị ọzọ ahụ abịaruo na-arịọ sị, ‘Onyenweanyị, Onyenweanyị, megheere anyị ụzọ! Ma ọ zara ha sị, ‘Ana m agwa ụnụ eziokwu, amaghị m ndị ụnụ bụ.’ Ya bụ na-echenụ nche n’ihina ụnụ amaghị ụbọchị mọbụ oge ọ ga-abụ.”

Oziọma nke Oseburuwa
A. Ekene dịrị Chukwu