IHE ỌGỤGỤ NKE MBỤ : Heb 13: 15-17. 20-21  
Ihe Ọgụgụ e wetara n’Akwụkwọ Hibru

Site na Jesu Kristi, ka anyị chunyerenu Chineke àjà otito mgbe niile, nke bụ mkpụrụ nke egbugbere ọnụ na-ekwupụta aha ya. Ụnụ ahapụkwala ime ihe ọma ma ọ bụ ime ka ndị ọzọ ghara isoro kẹrị ihe unu nwere, n’ihi na àjà dị otu a na-amasị Chineke. Rubeere ndị ndu unu isi, nọkedụkwa n'okpuru ha n'ihi na ha na-eche mkpụrụobi unu nche site n'ekpere, dị ka ndị ga-aza ajụjụ banyere unu. Ka ha were obi ụtọ na-eme nke a. Ya abụghị site n’obi ọjọọ, n’ihi na nke a agaghị abara unu uru.  Ugbu a, ka Chineke nke udo, onye si n’ime ndị nwụrụ anwụ kpoghachi Onye-nwe-anyị Jesu Kristi, nnukwu onye nche atụrụ, site n’ọbara nke ọgbụgba-ndụ dị ebebe, nyezuo unu ihe ọma niile iji mee uche ya. Ka O na-arụ n'ime unu ihe nke ahụ na-adị mma n'ihu ya, site na Jesu Kristi onye otito niile bụ nke ya ebebe ebebe. Amen.

Okwu nke Oseburuwa
A. Eneke dịrị Chukwu

ABỤỌMA NA AZỊZA YA : Ps 23: 1-3a. 3b-4. 5. 6 
Azịza: Chineke bụ onye nche m, ọ dịghị ihe m ga-achọ.  

1. Chineke bụ onye nche m, ọ dịghị ihe m ga-achọ.  
O na-eme ka m zuru ike ebe ahịhịa ndụ dị,
O na-eduga m na mmiri,
ebe ahụ ka ọ na-enye m ike.
Azịza: Chineke bụ onye nche m, ọ dịghị ihe m ga-achọ.  

2. O na-edu m n'ụzọ ezi omume; n’ihi aha ya.  
Ọbụlagodi na m na-agagharị n’ime ndagwurugwu nke ọnwụ,
egwu ọbụla agaghị atụ m,
n'ihi na I ji mkpara na ngụ gị nọ n'akụkụ m.
Ọ bụ ha na-enye m agbam ume.
Azịza: Chineke bụ onye nche m, ọ dịghị ihe m ga-achọ.    

3. I na-akwado m nri n'ihu ndị iro m.  
I tere m isi m mmanụ, iko m ejupụtala na-agbapụta.
Azịza: Chineke bụ onye nche m, ọ dịghị ihe m ga-achọ.  

4. N'ezie, obiọma na ebere ga na-eso m, ụbọchị ndụ m niile.  
Aga m ebi n’ụlọ nke Chineke ebebe ebebe.
Azịza: Chineke bụ onye nche m, ọ dịghị ihe m ga-achọ.  

Mbekụ:  

Alleluia, Alleluia:
Atụrụ m ga-ege m nti, 
Dị-nwe-nụ na-ekwu, amara m ha, ha na-eso m.
Alleluia

OZIỌMA : Mk 6: 30-34  
Ihe Ọgụgụ nke a si n’Oziọma dị asọ nke Mak dere

Ndị ụmụazụ Jesu lọghachikwutere ya kọọrọ ya ihe niile ha mere na ihe ha kụziri. O siri ha, “Bịanụ ka anyị gaa ebe sọ anyị ga-ano zuru ike nwa oge.” O kwuru nke a n’ihi na ọ̀tùtù mmadụ na-abịa, na-alakwa, nke mere na ha enweghị ohere ọbụla iri ihe. Ha banye n'ụgbọ mmiri, gaa ebe na-anaghị mmadụ. Ụtụtụ mmadụ hụrụ ha ka ha na-apụ, mātakwara ha. Ha jiri ọsọ si n’obodo dị iche iche buru Jesu na ndị ụmụazụ ya ụzọ, garuo ebe ha na-aga. Ka Jesu rịdata n'ugbo, O hụrụ ọ̀tùtù igwe mmadụ ka ha gbakọrọ, O nwee obi ebere n'ebe ha nọ n'ihi na ha dị ka atụrụ n’enweghị onye nche. O wee malite ikuziri ha ọtụtụ ihe.

Oziọma nke Oseburuwa
A. Ekene dịrị Chukwu